काठमाडौं। बालकुमारी घटनामा दुई युवकको मृत्यु भएको छ। भौतिक पूर्वाधार तथा यातायात मन्त्री प्रकाश ज्वालाले प्रयोग गरेको बा २ झ ५८६१ नम्बरको गाडीमा आगजनी घटनामा दुई युवकको मृत्यु हो।

बालकुमारीबाट सातदोबाटोतर्फ गइरहेका बेला ईपीएस आन्दोलनकारीहरुले पुलमै गाडी रोकेर मन्त्री तथा पीएसओ र चालकलाई बाहिर निकालेर आगो लगाएका थिए ।

आन्दोलनकारीले गाडीमा आगो लगाइएपछि प्रहरीले स्थितिलाई नियन्त्रणमा लिन गोली चलाउँदा दुई जनाको मृत्यु भएको हो।

मृत्यु हुनेमा करिब २३ वर्षीय सुजन राउत छन् । उनको इमाडोलस्थित किष्ट अस्पतालमा उपचारका क्रममा मृत्यु भएको हो ।

बालकुमारी घटनामा मृत्यु भएका अर्का युवकको पहिचान खुलेको छैन। पाटन अस्पतालमा उपचारको क्रममा उनको मृत्यु भएको प्रहरीलेले जनाएको हो।

प्रहरी गोलि नचलाएको छैन: एसपी कार्की

ललितपुर प्रहरी प्रवक्ता एसपी नवराज कार्कीले यो घटनामा गोलि नचलाएको बताए । उनले मन्त्रीकै सवारीसाधनमाथि तोडफोड र आगजनी भएपछि भीड हटाउन प्रहरीले कारवाही गरेको बताए ।

‘मृत्यु हुनेको शरीरमा गोली देखिएको छैन । टियरग्यास लागेको हुन सक्छ । प्रहरीले गोली चलाएको छैन । यो पोस्ट मार्टमबाट थाहा हुन्छ,’ एसपी कार्कीले भने ।