ओली सरकारले सिफारिस गरेका राजदूतहरूको सुनुवाइ प्रक्रिया आजदेखि
नागरिक प्रेस २९ साउन २०८१
काठमाडौं- प्रधानमन्त्री केपी शर्मा ओली नेतृत्वको सरकारले सिफारिस गरेका १८ देशका राजदूतको संसदीय सुनुवाइ आजदेखि प्रक्रिया सुरु हुँदैछ । ओली सरकारले यही साउन १४ गते १८ देशमा राजदूत सिफारिस गरेको थियो।
सुनुवाइ प्रक्रियाका प्रारम्भका लागि संसदीय सुनुवाइ समितिको बैठक दिउँसो सवा १२ बजे संघीय संसद भवन नयाँबानेश्वरको शंकर हलमा बस्नेछ ।
परराष्ट्र मन्त्रालयले आइतबार प्रस्तावित राजदूतहरूको नाम सुनुवाइका लागि संसद सचिवालयमा पठाएको छ ।
जसमा शंकर प्रसाद शर्मा- भारत, नरेशविक्रम ढकाल- साउदी अरब, प्रा. डा. कपिलमान श्रेष्ठ- दक्षिण अफ्रिका, प्राध्यापक धनप्रसाद पण्डित- इजरायल, रामकृष्ण भट्टराई- श्रीलङ्का, सनिल नेपाल- स्पेन, शैल रूपाखेती- जर्मनी, लोकदर्शन रेग्मी- संयुक्त राज्य अमेरिका, चन्द्रकुमार घिमिरे- बेलायत, डा. शिवमाया तुम्बाहाङ्फे- दक्षिण कोरिया, जङ्गबहादुर चौहान- रुस, रमेशचन्द्र पौडेल-कतार, प्राडा कृष्णप्रसाद ओली- चीन, सुम्निमा तुलाधर– डेनमार्क, डा. नेत्रप्रसाद तिमल्सिना– मलेसिया, प्रकाशमणि पौडेल– पोर्चुगल, रीता धिताल- पाकिस्तान र कान्ता रिजाल- अष्ट्रेलियाका राजदूत प्रस्तावित छन् ।
