काठमाडौं । नेपाल प्रिमियर लिग (एनपीएल) को क्वालिफायर टु मा आज कर्णाली याक्स र जनकपुर बोल्ट्सबीच प्रतिस्पर्धा हुँदैछ।

खेल कीर्तिपुरस्थित टीयू अन्तर्राष्ट्रिय क्रिकेट मैदानमा मध्यान्न साढे १२:३० बजे सुरु हुनेछ।

लिग चरणमा चौथो स्थानमा रहेको कर्णाली याक्सले बुधबार भएको एलिमिनेटरमा चितवन राइनोजलाई पराजित गर्दै क्वालिफायर २ मा स्थान बनाएको थियो।

लिगमा दोस्रो स्थानमा रहेको जनकपुर बोल्ट्स भने क्वालिफायर १ मा रहेको सुदूरपश्चिम रोएल्सससँग पराजित हुँद क्वालिफायर २ खेल्न लागेको हो।

सुदूरपश्चिमसँग पराजित भए पनि जनकपुरका लागि फाइनल पुग्ने अर्को अवसर आजको खेल हुनेछ। क्वालिफायर १ को विजेता सुदूरपश्चिम फाइनल पुगिसकेको छ।

अब आज हुने खेलको विजेताले उपाधिका लागि सुदूरपश्चिमसँग भिड्नेछ। मंसिर १५ गतेदेखि जारी एनपीएलको फाइनल खेल पुस ५ गते हुनेछ।