काठमाडौं- कार्यकाल सकिएर अवकाशमा जान लागेका चार जना सशस्त्र प्रहरी बलका डिआइजीहरूको पदावधि थप गरिएको छ।

मंगलबार साँझ बालुवाटारमा बसेको मन्त्रिपरिषद्को बैठकले १२ बजेबाट पदावधि सकिन लागेका डिआइजीहरूको एक वर्ष पदावधि थप गरेको हो।

पदावधि थपिनेहरूमा कमल गिरी, गणेश ठाडा मगर, कुलबहादुर नेम्वाङ र शम्भु सुवेदी रहेका छन्।

सशस्त्र प्रहरी नियमावली २०७२ को दफा ६५ को (ग) अनुसार सशस्त्रका डिआइजीको पदावधि चार वर्ष हुन्छ।

उनीहरू २४ गते राति १२ बजेबाट अवकाशमा जान लागेका थिए। त्यसअघि नै मन्त्रिपरिषदले म्याद थप गरेको हो।

नियमावलीको दफा ६५ कै (ग)को (२) उपनियममा सशस्त्र प्रहरी महानिरीक्षक (आइजी)को सिफारिसमा नेपाल सरकारले एआइजी र डिआइजी पदावधि चार वर्षपछि एक वर्ष थप्न सक्ने प्रावधान छ।